“Bel in ka in wadä tech jabix ti yanaji a ixi'imi.

Ka yanaji a yok'olkaba ma' yan ma'ax k'u'i a yan a janteje, ka a wuk'u.
Te'eji tanoo' u yadik a kristiano ka yanak k'u'i a ku jantoo'.
U k'aatajoo' ti'i a dioso, u k'aatajoo' ti'i a witzi tuba u talel, tuba u lik'il k'u'i a ku jantoo', a ixi'imi.

Te'i u yadaj a Chaaka:
—Tane'ex a k'aatik a janal, a wuk'ul — ku t'an.
Tan ti k'aatil ti'i ka ti jante ma' ti jantik ti bajil tiki junal. Tan ti k'aatik kuchi a ixi'imi, le'ek a walak u jantabälä. —
— Pwes ki, ka' a wile'ex — ku t'an — Bel in kin bete. Ka' wile'ex — ku t'an a Chaaka.

U tz'aj a lemleme. Tan ilik u jatz.
Pa'axi a tunichi, noxi jabix jun p'eel naj.
Jebi a tunichi.

U yilaj a Chaaka i u yilaj ilik u moso to tanoo' u yokol aj say yalam a tunichi.
Kajoo' u puute a ixi'im aj say yalam a tunichi.
Tanoo' u jok'sik. Tanoo' u jok'sik a ixi'imi.

U yilaj a Chaaka ti yan a ixi'im yalam a tunichi.
Balo' ka u yeeltaj a Chaaka ti yan a ixi'im yalam a tunichi.
Pa'axi a tunichi.
Jiini a ixi'imi.
Te'eji okoo' u moloo'.
U molajoo' a kich'pana, a ma' chuweni, le'ek tun a säk ixi'imi.
U molajoo' ilik a chen kän k'aak'ajiji, leek tun a kän ixi'imi.
U ka' molajoo' ilik a k'äs chäkä umen k'aak'a, le'ek a chäk ixi'imi.
U ka' molajoo' a chuwen ti ki'i, le'ek tun a box ixi'imi.

Yaab u joksajoo' a santo ixi'imi, chen etel u yanil aj say y mentäk aj say aleebe tzaj u bensik u yixi'im porke le'ek u käxtajoo'. Wa kuchi ma' yok'laloo' aj saya, ma' kuchi walak ti jantik a ixi'im aleebe, porke uchi ma' yan a ixi'imi.

Balo' ti yanaji a ixi'imi.”